Юрась Губарэвіч у 2016 годзе заняў пасаду старшыні Руху "За свабоду", замяніўшы стваральніка гэтай арганізацыі Аляксандра Мілінкевіча. Сам Юрась у грамадска-палітычнай дзейнасці са студэнцкіх гадоў. Пачынаў у студэнцкім прафсаюзе, удзельнічаў у Партыі БНФ (і па сёння застаючыся сябрам гэтай партыі). Найбольшую вядомасць Губарэвіч атрымаў калі ў 2003 годзе пад час мясцовых выбараў арганізаваў у Белаазёрску моцную выбарчую кампанію, дзякуючы чаму на кароткі час Белаазёрск стаў адзіным горадам дзе большасць у гарсавеце была дэмакратычная. Сам Губарэвіч тады заняў пасаду намесніка старшыні гарсавету. Праўда, праз некаторы час улады правялі рэдкія для краіны "давыбары", увёўшы ў склад савету праўладных кандыдатаў і ўсе дэмакраты страцілі свае пасады у прэзідыюме і ў камісіях.
Губарэвіч - адзін са стваральнікаў Руха "За свабоду". Рух узнік у 2007 годзе пасля прэзідэнцкіх выбараў на якіх адзіным кандыдатам ад дэмакратычных сілаў быў Аляксандар Мілінкевіч. Ён быў поўным антыподам Лукашэнкі: інтэлегентны кандыдат навук, навуковец, які ўмее слухаць, а не толькі шмат гаварыць, мае моцную сям'ю з актыўнай і прыгожай жонкай. Па-сутнасці, "Рух" і ствараўся "пад Мілінкевіча", але з цягам часу палітык стаў усё больш вяртацца да навукі і ў выніку сыйшоў з пасады на якую і выбралі Губарэвіча.
Пасля свайго выбрання на гэтую пасаду, Юрась Губарэвіч упершыню пабывае ў Оршы. Сустрэча з ім пройдзе ў панядзелак 11 чэрвеня а 18-00 па адрасе вул. Камсамольская, д. 16, кв. 4. Уваход вольны.
