Ураджэнец Рэчыцы Сяргей Сазонаў і ўраджэнец Воршы Аляксандр Ступніцкі, якія ваявалі ў складзе ПВК «Вагнэр» у Сірыі, падазраюцца ў 14 эпізодах катаванняў і зверскіх расстрэлаў у вёсцы Матыжын Макараўскага раёну Кіеўскай вобласці.
Таксама, паводле следства, Сяргей Сазонаў і Аляксандар Ступніцкі ўдзельнічалі ў выкраданні, катаванні і забойстве старасты Матыжына Вольгі Сухенкі, яе мужа і сына.
Аляксандр Ступніцкі
Аляксандр Ступніцкі нарадзіўся ў 1989 годзе ў Воршы. Паводле ранейшых звестак, якія даходзілі пра яго да ўкраінскіх спецслужбаў, яго жонка і дзіця жывуць у Воршы дагэтуль.
Акрамя Украіны Ступніцкі ваяваў таксама ў Сірыі і Судане. Нагадаем, што рэжым Лукашэнкі па крымінальным артыкуле «удзел у ваенным канфлікце на тэрыторыі замежнай дзяржавы» пераследуе выключна тых беларусаў, якія ваююць за Украіну. Баевікоў, якія сталі на бок Расеі, не пераследавалі практычна ніяк. Той жа Ступніцкі, паводле ранейшых журналісцкіх звестак, прыязджаў у Воршу ўжо пасля ўдзелу ў вайне на Данбасе супраць законнай украінскай улады.
