Працягваем падводзіць вынікі мінулага году, і на чарзе ліпень. Сярэдзіна лета запомнілася шэрагам падзей, зьвязанымі найперш з нашым сайтам і пераследам яго галоўнага рэдактара і іншых актыўных аршанцаў.
Але перадусім трэба сказаць, што аршанскі міні-футбольны клуб «Вітэн» у гэтым месяцы стаў чэмпіёнам Беларусі ў 5-ы раз. Аршанская каманда перамагла ва ўсіх 27 матчах, праведзеных перад тым, як выйсці ў фінальную серыю. У фінале з гомельскім клубам ВРЗ «Вітэн» у 5 матчах здабыў 3 перамогі і стаў найлепшай камандай Беларусі.
Раніцай 8 ліпеня адбыліся ператрус і затрыманне галоўнага рэдактара Orsha.eu Ігара Казмерчака. Затым яго выпусцілі, а потым зноў затрымалі і выпусцілі. У канцы месяца стала вядома, што крымінальны пераслед па відавочна сфабрыкаванай справе спынены. Але радавацца не было чаму: неўзабаве стала вядома, што АМГА «Звяз» і ТБМ страцяць рэгістрацыю, а «Цудоўную краму» прымусова зачыняць. «Звяз» быў адной з найбольш плённых арганізацый горада цягам многіх гадоў і рэалізаваў шмат праектаў, праз яго прайшлі сотні маладых аршанцаў. А «Цудоўная крама» прадавала ўнікальныя вырабы рамеснікаў з усёй Аршаншчыны, у яе прыязджалі людзі з іншых гарадоў і краін.
Таксама ў ліпені пачуўся абражаным першы намеснік начальніка Талачынскага РАУС, за што пачалі судзіць 41-гадовага аршанца.
Галоўную падатковую інспектарку Воршы асудзілі на 8 гадоў зняволення.
Памёр Віталь Гранскі, савецкі дысідэнт. Тарасаў-Гранскі быў вельмі рэлігійным чалавекам і не баяўся выказваць сваю пазіцыю, што СССР лічыў непрымальным для інжынера. У 1979 годзе пісьменнік нават заявіў, што не хоча жыць у СССР і запрасіў дазволу выезда за мяжу. Замест гэтага атрымаў канчатковае звальненне з працы. У 2004 годзе ён, жывучы ў Воршы, выпусціў кнігу «Огонь на себя или один против КГБ». У 2016-м кніга перавыдаецца ў Нямеччыне, а сёння яе можна знайсці ў электронным выглядзе. Пазней былі напісаныя кніга «Кое-что о коммунстическом прошлом...», «Виталий Гранский — жизнь и деятельность», а таксама зборнік кароткіх пабытовых расказаў.
