1906 г., 23 сакавіка Нарадзіўся Ісак Ісакавіч Любан (г. Чэрыкаў Магілёўскай вобл.), беларускі кампазітар. Заслужаны дзеяч мастацтваў Беларусі (1956). Лаўрэат Дзяржаўнай прэміі СССР 1946 г. Аўтар “Песні пра Оршу” (на словы М. Лужаніна і А. Куляшова). Памёр 7 лістапада 1975г.

І.І. Любан.

1906 г., 13 (26) сакавіка Адбылася забастоўка навучэнак старэйшых класаў Аршанскай Аляксееўскай жаночай гімназіі ў знак пратэсту супраць пакарання смерцю кіраўніка паўстання маракоў Чарнаморскага флоту лейтэнанта Пятра Пятровіча Шмідта.

1906 г. Нарадзіўся Дзяніс Яфімавіч Касачоў (в. Бортнікава Аршанскага р-на), удзельнік падпольнага і партызанскага руху на Віцебшчыне ў гады Вялікай Айчыннай вайны. Да вайны працаваў памочнікам машыніста паравознага дэпо ў Оршы. З ліпеня 1941 г. камандзір дыверсійнай групы на чыгунцы. З верасня 1942 г. камандзір партызанскага атрада “Знішчальнік”. Загінуў 20 лістапада 1942 г. Імем Дзяніса Касачова названа вуліца ў Оршы.

Дз.Я. Касачоў.

1906 г. У Оршы заснаваны сіндыкат піваварных заводчыкаў Паўночна-Заходняга краю.

Бутэлька з-пад піва завода Б.Я. Вайнберга ў Оршы. На бутэльке рэльефная выява фірмовага знака завода – крылаты вензель з ініцыялаў уладальніка.

1906 г., 16 (29) чэрвеня Нарадзіўся Іван Данілавіч Чарняхоўскі (с. Аксаніна Уманскага р-на Кіеўскай вобл., Украіна), савецкі ваенны дзеяч. Генерал арміі (1944). Двойчы Герой Савецкага Саюза (1943, 1944). У Чырвонай Арміі з 1924 г. У Вялікую Айчынную вайну з красавіка 1944 г. камандуючы войскамі 3-га Беларускага фронту, якія вызвалілі Оршу. Загінуў 18 лютага 1945 г. Імем Івана Чарняхоўскага названа вуліца ў Оршы (былая Вясёлая).

І.Д. Чарняхоўскі.

1906 г. Разгромлена паліцыяй Аршанская арганізацыя РСДРП (б).

1906 г., 15 (28) кастрычніка У Оршы адкрыта рэальнае вучылішча. Будынак з’яўляецца прыкладам грамадзянскай архітэктуры пачатку ХХ стагоддзя. Рэканструіраваны ў 2008 г. Унесены ў Дзяржаўны спіс гісторыка-культурных каштоўнасцяў Рэспублікі Беларусь. Цяпер тут месціцца гімназія №2. У 1907-1910 гадах выкладчыкам матэматыкі і прыродазнаўства ў рэальным вучылішчы працаваў вядомы дзеяч бальшавіцкай партыі П. М. Лепяшынскі.

Будынак рэальнага вучылішча. З фотапаштоўкі пачатку ХХ ст.

1906 г. Асобныя гурткі партыі сацыялістаў-рэвалюцыянераў аб’ядналіся ў групу, якую ўзначальваў камітэт, што складаўся з прадстаўнікоў гурткоў. Група з’яўлялася філіяй Магілёўскай арганізацыі эсэраў. З’яўлялася нешматлікай – 20-30 чалавек. Сумесна з бальшавікамі і бундаўцамі эсэры ўдзельнічалі ў рэвалюцыйных выступленнях 1905-1907 гг.

1906 г., 6 (19) снежня Нарадзіўся Леанід Ільіч Брэжнеў (г. Каменскае, у 1936-2016 гг. Днепрадзяржынск, Украіна), савецкі партыйны і дзяржаўны дзеяч, Герой Сацыялістычнай Працы (1961), 4 разы Герой Савецкага Саюза (1966, 1976, 1978, 1981). Маршал Савецкага Саюза (1976). Пасля заканчэння ў 1927 г. тэхнікума атрымаў кваліфікацыю землямера 3-га разраду і працаваў некалькі месяцаў у Коханаўскім раёне Аршанскай акругі (цяпер Талачынскі раён Віцебскай вобласці). Потым на партыйнай рабоце. Удзельнік Вялікай Айчыннай вайны. З 1964 г. Першы сакратар (з 1966 Генеральны сакратар) ЦК КПСС, адначасова з чэрвеня 1977 г. Старшыня Прэзідыума Вярхоўнага Савета СССР. У гады знаходжання Брэжнева на вышэйшых кіруючых пасадах у краіне нарасталі негатыўныя працэсы ў эканоміцы, сацыяльнай і духоўнай сферах жыцця (т.з. брэжнеўскі застой). Памёр 10 лістапада 1982 г.

Л.І. Брэжнеў.

1906 г. Піва аршанскага завода Б. Вайнберга было ўзнагароджана залатым медалём на міжнароднай кулінарнай выставе ў Вене (Аўстрыя).

Адлюстраванне медаля на бутэльцы. (апрацоўка Э. Навагонскага)

Працягваем публікаваць Храналогію гісторыі Оршы ад гісторыка Віктара Лютынскага: уступ 1552 г. - 1562 г., 1563 г. - 1566 г. Частка 2. 1566- 1587 гг. Частка 3. 1579 г. - 1585 г. Частка 4. 1586 г. - 1595 г., 2 жніўня. Частка 5., 1596 г., люты - Канец XVI ст. Частка 6,